पंढरपूर – सोलापूर जिल्ह्यातील उबाठा शिवसेना गटाचे माजी आमदार उत्तमराव खंदारे आणि रविकांत पाटील व माजी जिल्हाप्रमुख अमर पाटील तसेच वाशिम जिल्ह्यातील वंचित बहुजन आघाडीचे जिल्हाध्यक्ष अनिल गिरकर, सरपंच संघटनेचे अध्यक्ष संदीप ठाकूर व माजी पोलीस उपअधीक्षक रायते यांनी गुरुवारी रात्री शिवसेना पक्षात जाहीर प्रवेश केला. याप्रसंगी माजी मुख्यमंत्री एकनाथ शिंदे यांनी त्यांचे पक्षात स्वागत करून त्यांना भावी सामाजिक आणि राजकीय वाटचालीसाठी शुभेच्छा दिल्या.
त्यासोबतच अहिल्यानगर जिल्ह्यातील श्रीराम महासंघाचे राष्ट्रीय अध्यक्ष सागर बेग, श्रीराम महासंघाचे अध्यक्ष आकाश बेग, उबाठा गटाचे नेवासा नगरपंचायतीतील माजी नगरसेवक सचिन वडागळे, राष्ट्रवादी काँग्रेस पक्षाचे युवा जिल्हा सरचिटणीस मनोज भिसे तसेच अहिल्यानगर जिल्ह्यातील नगरसेवक, पदाधिकारी आणि युवा पदाधिकाऱ्यांनीह सुद्धा शिवसेनेत जाहीर प्रवेश केला.
तसेच वाशिम जिल्ह्यातील ५३ सरपंच, २३ उपसरपंच आणि ६३ ग्रामपंचायत सदस्यांनी देखील यासमयी हाती भगवा झेंडा घेत शिवसेनेत जाहीर प्रवेश केला.
गेली अडीच वर्षे महायुती सरकारने केलेल्या कामांच्या बळावर आणि लोककल्याणकारी योजनांमुळे विधानसभा निवडणुकीत राज्यातील जनतेने आपल्याला भरभरून मतदान केले. त्यामुळेच आता शिवसेनेमध्ये प्रवेश करणाऱ्यांची संख्या दिवसेंदिवस वाढत चालली आहे. त्यामुळे आता आपली जबाबदारी अजून वाढली असून ‘गाव तिथे शिवसेना’ आणि ‘घर तिथे शिवसैनिक’ निर्माण करण्यासाठी सदस्य नोंदणी अभियानाची प्रभावीपणे अंमलबजावणी करावी ,असे आवाहन याप्रसंगी उपमुख्यमंत्री एकनाथ शिंदे यांनी सर्वांना केले. तुमचे प्रश्न सोडवण्यासाठी मी तुमच्या पाठीशी ठामपणे उभा असल्याची ग्वाही यासमयी त्यांनी बोलताना दिली.
यावेळी आमदार भावना गवळी, शिवसेना उत्तर महाराष्ट्र सचिव भाऊसाहेब चौधरी, शिवसेना सचिव सुशांत शेलार, शिवसेना प्रवक्त्या प्रा.ज्योती वाघमारे, सोलापूर जिल्हाप्रमुख मनीष काळजे, नाशिक जिल्हा संघटक योगेश म्हस्के तसेच प्रमुख पदाधिकारी आणि शिवसैनिक आवर्जून उपस्थित होते.
